《好人記》
昨日同好朋友們通宵夜談，講起當年喺馬經版嘅所見所聞。可能我幸運，同事同阿頭都對我非常好，而當中發生一件事，令我今日都難以忘懷。
話說嗰時用咗4個月，先搵到我人生第一份編輯工作，人工雖然少，但同事們相處融洽，直頭係陶淵明講嘅「桃花源」。當時，有一個50幾歲嘅老編輯教我對賽績表，收咗工，仲會陪我去西灣河食飯，佢叫Joe哥。
縱使Joe哥有番咁上下年紀，但佢絕對比我潮，對波鞋衣著都有研究，至於我……大家明啦，不再多講。有時，我會喺食飯嘅時候同Joe哥講我嘅夢想係做作家，Joe哥會話︰「泰仔，你第日出書，記得畀本我。」
點知去到6、7月左右，馬季未煞科，老闆忽然畀人拉咗，公司因為資金問題，要炒一半人。我仲記得嗰晚星期三跑完夜馬，部門二哥叫晒成班兄弟入房，好似宣判死刑咁，拎咗兩封解僱信出嚟，一封畀我，一封畀咗Joe哥︰「兩位，因為你哋最新，所以唔好意思……希望你哋明白。」
儘管因老闆被拉而被炒魷係無辜，但我同Joe哥都決定幫班兄弟做埋最後一個月。嗰個月，全隊人一片愁雲慘霧，就算阿頭賢哥每日買啲嘢返嚟畀大家食，大家都好似送殯咁。可能江湖經驗少，我嘅唔開心幾乎寫喺塊臉上面，Joe哥夜晚食飯見到就會話︰「泰仔，唔使唔開心喎，有我陪你。」
如是，又過咗大半個月，當我以為差唔多執包袱之際，有日，部門二哥又叫咗我同Joe哥入房，話畀我哋知有新投資者注資︰「Fit！又可以好似以前咁，繼續做，唔使炒！」
邊估到下一刻仲癲過拍電視劇。
「但係上面話只能夠留低你哋一個……」
我聽完，心情都未嚟得及平復，已經聽到一把聲話︰「你留低泰仔啦，我本身都唔做架喇。」
冇錯，Joe哥選擇自己走，留低我。
出到去，我同Joe哥講︰「對唔住……Joe哥……我……」
佢仲要安慰我︰「傻仔嚟嘅，我本身都諗住唔做退休享福架喇！你仲要學做編輯然後出書架！」
噚晚講返起呢幕，我爭啲忍唔住流眼淚。
我希望自己效法到Joe哥嘅精神，往後日子，每當有新同事，我都嘗試盡力照顧（雖然大家可能唔覺）。
Search